Un novo curso, unha nova aventura

O curso pasado intentamos dar ao noso labor educativo-pastoral sabor a felicidade e temos que seguir así durante este novo curso e todos os que veñan. Pois, sen felicidade a vida empobrécese e tamén as nosas relacións.

Este curso 2018-2019 somos convidados a unha aventura, unha aventura que iremos vivindo paseniño. Polo que non podemos ir sempre ás presas sen gozar das persoas que camiñan connosco e das moitas experiencias que nos regalará este curso.

Nesta aventura, nesta fermosa misión que temos entre mans, non imos sos: somos unha gran familia, a familia que formamos a nosa comunidade educativo-pastoral (alumnado, familias, educadores e salesianos) e temos que ser conscientes de que:

cada un de nós somos incribles e que vivimos rodeados de talento, por iso temos que valorar a todos e todas;

precisamos confiar nas persoas coas que camiñamos e decatarnos de que hai moitas persoas que confían en nós para nos axudar nesta aventura dun novo curso;

sempre somos cada un de nós os que decidimos. Somos libres para escoller os nosos camiños, pero sempre desde a nosa responsabilidade, como pais ou nais, educadores e educadoras ou alumnas e alumnos;

se queremos conseguir resultados diferentes teremos que intentar algo novo. Por isto un novo curso é unha nova oportunidade para cada un de nós.

Así, nesta andaina que faremos xuntos estamos convidados a mirarnos a nós mesmos para reconciliarnos coa nosa historia persoal, a mirar cara o noso interior para descubrirnos como seres que temos un proxecto que realizar, a mirar cara fóra, cara o noso mundo exterior, para descubrirnos con outros aos que podemos servir e axudar e, finalmente, mirar cara diante para afianzar as propias potencialidades e medrar en autoestima e seguridade persoal.

Ante todos nós, pequenos e maiores, temos un curso no que non debemos deixar de aprender e medrar coma persoas e coma cristiáns seguindo o camiño trazado hai tempo por Xesús de Nazaret.

FELIZ AVENTURA, FELIZ CURSO 2018-2019!